ယနေ.အတွက် ဝိညာဥ် ခွန်အား

ဘုရားသခင်၏အမြင်၌ အရည်အချင်း ပြည့်မီသည်

နောဧသည်... ဘုရားသခင်နှင့်အတူ သွားလာ၏။ (း၉)ကောလိပ်ကျောင်းအောင်ပြီးနောက် ကွန်ပြူတာကုတ်သင်္ကေတလည်း မရေးတတ်၊ စီးပွားရေးအသိ မဆိုစလောက်သာရှိသော ကျွန်မကို နည်းပညာဆိုင်ရာ အကြံပေး လုပ်ငန်းတစ်ခုမှ အလုပ်ခန့်ခဲ့သည်။ အလုပ်ဝင်ရန် တွေ့ဆုံမေးမြန်းချိန်၌ ထိုကုမ္ပဏီ သည် အလုပ်အတွေ့အကြုံရှိခြင်းကို အဓိကမထားကြောင်း သိလိုက်ရသည်။ စင်စစ် ပြဿနာကို ထိုးထွင်းဆန်းသစ်စွာ ဖြေရှင်းနိုင်မှု၊ မှန်ကန်စွာ ဆုံးဖြတ်နိုင်မှု၊ အဖွဲ့နှင့်အလုပ်လုပ်ကိုင်နိုင်မှု စသည့် ပုဂ္ဂိုလ်ရေး အရည်အသွေးရှိခြင်းက အလေးသာပါသည်။ ကုမ္ပဏီမှ ဝန်ထမ်းသစ်ခေါ်ယူပြီး ၎င်းတို့ လိုချင်သည့် ဝန်ထမ်း အဖြစ် ပုံစံဝင်လာသည်အထိ လိုအပ်သောကျွမ်းကျင် စွမ်းရည်ရှိလာအောင် လေ့ကျင့်သင်ကြားပေးလျှင် ရသည် ဟု ယူဆသည်။

နောဧ၌လည်း သင်္ဘောကြီးဆောက်လုပ်ရန် အရည်အချင်းရှိကို မရှိပါ။ သူသည် လှေလည်း မဆောက်တတ်၊ လက်သမားလည်း မဟုတ်ခဲ့ပါ။ သူသည် မြေကြီးကို ထွန်ယက်လျက် စိုက်ပျိုးလုပ်ကိုင်လျက် ဘဝကိုကျေနပ်နေသူဖြစ်သည်။ သို့သော် ထိုခေတ်ကာလ၏ဆိုးညစ်မှုကို ဖြေရှင်းရန် ဘုရားရှင် ဆုံးဖြတ်ချက်ချသည်တွင် နောဧသည် ပေါ်လွင်သူဖြစ်သည်။ အဘယ်ကြောင့်ဆိုသော် သူသည် ‘‘ဘုရားသခင်နှင့် အတူ သွားလာသူ’’ (က ၆း၉)ဖြစ်သည်။ သူ့ဝန်းကျင်ရှိ ယိုယွင်းပျက်စီးမှုကို ဆန့်ကျင်ပြီး မှန်ကန်ရာ လုပ်ရဲသည့် သတ္တိခွန်အား သူ၌ ရှိသည်။ သွန်သင်မှုကို ခံယူလိုက်နာနိုင်သည့် နောဧ၏နှလုံးသားကို ဘုရားရှင်လေးစားသည်။

ဘုရားသခင်ကို အစေခံရန် အခွင့်အရေးကြုံလာပါက ထိုအလုပ်အတွက် အရည်အချင်းမရှိ၊ မပြည့်မီဟု ကျွန်ုပ်တို့ ခံစားရတတ်သည်။ ဘုရားသခင်သည် ကျွန်ုပ်တို့၏ကျွမ်းကျင်မှု စွမ်းရည်ကို အဓိက မထားသည့်အတွက် ကျေးဇူးတင်ရမည်။ ကိုယ်တော်သည် ကျွန်ုပ်တို့၏ အကျင့်စရိုက်၊ သူ့အပေါ် ချစ်သည့်စိတ်၊ ကိုယ်တော့်ကို ကိုးစားသည့်စိတ်ကို ဆုချသောဘုရားဖြစ်သည်။ ဤအရည်အသွေးများကို ကျွန်ုပ်တို့ အတွင်း၌ ဝိညာဉ်တော်က ပျိုးထောင်ရှင်သန်သောအခါ လောကမြေ၌ သူ့အလိုတော် ပြည့်စုံစေရေး ဘုရားသခင်သည် မည်သည့်နည်းဖြင့်မဆို အမှုကြီးငယ်မဟူ ကျွန်ုပ်တို့ကို အသုံးပြုနိုင်ပါသည်။ JENNIFER BENSON SCHULDT

သင့်အတွက် မည်သည့်အကျင့်စရိုက် စွမ်းရည်များကို ဘုရားရှင်အား ပျိုးထောင်ပေးစေလိုသနည်း။ ဘုရားရှင်ထံ တောင်းလျှောက်လိုက်ပါ။

ချစ်တော်မူသောအဘဘုရား၊ မည်သည့်နည်းဖြင့်မဆို ကိုယ်တော့်အား အစေခံလိုသောစိတ်ကို ပေးသနားတော်မူပါ။ အတွေ့အကြုံမရှိသည့် ကဏ္ဍအတွက် ကျွန်ုပ်ကို ပြင်ဆင်ပါ။ ကိုယ်တော်ကို ချီးမြှောက်နိုင်မည့်အကြောင်း ကျွန်ုပ်အား ဝိညာဉ်တော်နှင့် ပြည့်စေတော်မူပါ။